ШЕРТПЕ КҮЙДІҢ ШЕБЕРІ АНЫҚТАЛДЫ
ҚР Мәдениет және спорт министрлігінің қолдауымен Құрманғазы атындағы Қазақ Ұлттық халық аспаптар оркестрі ұйымдастырған Республикалық «Шертпе күй» дәстүрлі музыкалық конкурсы өз мәресіне жетті.
Конкурсқа Қазақстанның әр өңірінен жиналған 16 мен 35 жас аралығындағы 45 қатысушы өнер көрсетіп, бақ сынасты. Үш күнге созылған дүбірлі додаға қатысушылар дәстүрлі шертпе күй мектебі өкілдерінің шығармасын орындап, үздік шыққан 15 қатысушы екінші кезеңге табан тіреді. Жүзден жүйрік, мыңнан оза шауып, жүлделі орындарға ие болған байқау жеңімпаздарына Қазақстан Республикасы Мәдениет және спорт министрі Дәурен Әскербекұлы Абаев мол шығармашылық табыс, өнер жолында жемісті жетістіктер тілей отырып, бірінші орын иегерінің марапатын салтанатты түрде табыстады.
Сондай-ақ, концерт барысында Құрманғазы атындағы Қазақ ұлттық халық аспаптар оркестрінің 90 жылдығы, Нұрғиса Тілендиев атындағы академиялық фольклорлы-этнографиялық «Отырар сазы» оркестрінің биыл 40 жылдық мерейтойына орай екі оркестрге арнайы дайындатқан сыйын Freedom Holding Corp компаниясының бас атқарушы директоры, демеушісі Тимур Турлов пен ҚР Мәдениет және спорт министрі Дәурен Әскербекұлы табыстап, сыйға тартылған қырық домбыраны жасаған шебер Жолаушы Тұрдығұловты арнайы алғыс хатпен марапаттады.
Фестивальдің Бас жүлде иегері Мадияр Сүлейменов шертпе күйдің шебері атанып, 1 млн теңге көлеміндегі сыйақымен марапатталды. Ал фестивальдің бірінші орын иегерлері – Нұрғали Төлеби мен Құдайбергенов Дарын 750 мың теңгені құрайтын сыйақыны иеленсе, екінші орынға Сырым Шонбаев пен Ардақ Елеусіз жайғасты. Үшінші орын Тұрсынбек Ілияс, Бекет Бексұлтан, Жарқыннұр Ержанатқа бұйырды. Ал «Үміт» арнайы дипломымен Мәуетбек Лунара, Ілиясов Нұржан марапатталды. Жанту Дадабаев, Саматова Айымгүл, Тілеубек Інжу, Тоқтаров Дастан, Талапхан Ерболат фестивальдің дипломанттары атанып, арнайы ақшалай сыйақыны иеленді.
